وعليكم السلام ورحمة الله وبركاتة
أختي الكريمة نـايـس أتمني لك رحلة موفقه بإذن الله
- كيفيه حجز التذاكر باقل الاسعار من متى احجز ليقل سعر التذكره .. ومن اين احجزها من مكتب سياحه والا من المطار؟...وكم السعر العام للتذكره
بخصوص التذاكر تحجزينها من الافضل قبل وقت سفرك بمدة كافيه لاتزيد عن ثلاث أشهر ولا تقل عن أسبوعين حتى تستطعين ان تحصلين على اسعار مناسبه وتحجزينها من الانترنت من موقع الخطوط عن طريق الفيزا او عن طريق مكتب سفريات او الخطوط اللي راح تروحين عليها او من المطار اذا بغيتي كل الطرق تؤدي الى روما
والخطوط اللي تطلع للمالديف هي الاماراتيه والقطريه والعمانيه والسيرلانكيه والاتحاد عبر سيرلانكا الاسعار بشكل عام تتراوح بين 5000 الى 2500 للشخص الواحد و تختلف باأختلاف الخطوط ففي القطريه والاماراتيه اقل سعر ممكن تحصلين عليه هو 4000 ريال واعلا سعر 6500 والعمانيه والسيرلانكيه بين 2500 الى 4000 حسب معلوماتي والاتحاد ماعندي خلفيه عن سعرها لانها ترانزيت لابوظبي ومن ثم سيرلانكا وتقدرين تتاكدين من مكتب الطيرآن اللي راح تحجزين عليه
2- انا بسافر اسبوع للمالديف فكم تكون التكلفه لشخصين انا وزوجي؟
التكلفه تتوقف على الوقت هناك مواسم فالمالديف تمتد بين شهر نوفمبر الى شهر آبريل ترتفع فيه الاسعار في الكرسمس وراس السنه وعيد الحب حيث الاجانب بعدد هائل هناك وتحصلين الفنادق فل والاسعار غاليه جدآ وتبتدئي تقل الاسعار تدريجين في مارس وآبريل ومايو الى سبتمبر تعود وترتفع من جديد ومن آبريل الى سبتمبر تكثر الامطار في المالديف
الحسبه بشكل تقريبي اذا حصلتي تذاكر بقيمة 4000 للشخص عندك الفيلا الشاطئية ارخص من المائية ممكن تكون الليله من 300 دولار 1000 دولار على حسب التواريخ اللي راح تروحين فيها وعندك الطائرة المائية للشخص 370 دولار اللي هي وسيلة الانتقال من مطار مالى للمنتجع وعندك المصروف اليومي 300 دولار للعشاء والغداء والانشطه اللي راح تمارسونها هناك من صيد سمك والالعاب مائية وغيرها من الانشطه
وبعد ماتزوديني بالتواريخ المقترحه ممكن اجيب لك حسبه تقريبيه للتكلفه
3- كيف يتم حجز الفنادق هل من مكاتب سياحيه والا اذا رحت هناك احجز؟
الحجز يكون طبعا قبل وهو الافضل المالديف تختلف عن الدول الاخري لا يوجد بها الا منتجعات وممكن وقت وصولك تحصلين المنتجعات ممتلئية او الاسعار مبالغ فيها فااضمن لك ان تحجزي من قبل وعندك الاماراتيه للعطلات تقدرين تاخذين عن طريقها تذاكر وسكن وتنقل من والى المنتجع وعندك موقع اجواد ممكن تحجزين عن طريقه وموقع بوكنج وعندك ايضا مكاتب السفريات
4- متى افضل وقت للسفر الى المالديف وكيف الجو هناك؟
الموسم من نوفمبر الى آبريل ولا يسقط فيه امطار ومن مايو الى سبتمر تنزل الامطار وتكثر من يونيو الى أغسطس والجو عموما واحد بالمالديف الفرق في سقوط الامطار وفي ناس يحبون يروحون وقت الامطار وفي ناس مايحبون المطر والاسعار تحكم الامر دائما في السيزون الاسعار مرتفعه ممكن تكلفك الرحله مبالغ عاليه ولكن من يونيو الى أغسطس ممكن بحدود 20 ألف الى 30 ألف تروحين
5- وماهي افضل طريقه لصرف المال من بطاقه فيزا والا اصرف فلوسي للدولار واخليها معي والا بطاقه صرافي الراجحي فيها فيزا هل تكفي؟
الامر هذا راجع لك ممكن تاخذ كاش وبطاقه فيزا احتياط انا عن تجربه كان المبلغ كاش معنا 5000 دولار مع بطاقة فيزا احتياط انا احب اخذ كاش معي وفيزا احتياط ماعندك مشاكل بالامر هذا
6- ماهي افضل الفنادق في المالديف واسعارها لمن لديه الخبره؟
راح اذكر لك مجموعه من المنتجعات اما الاسعار مثل ماقلت لك تختلف مع اختلاف وقت السفر
المجموعه المذكورة على سبيل الذكر لا الحصر وهم الافضل بااجماع اغلب الاعضاء ورواد بوابة الجزر
(( كونراد . دبليو . انتار ديغوا . كورمبا . الشيراتون فل مون . الهلتون فوشيه . الفور سيزون . شانغرالا . ون اونلي . ))
وغيرهم الكثير واي استفسار اخر انا حاضرة للرد والمساعدة
رد مع اقتباس
المفضلات