الله الله
ردود عسل وما عليها كلام
أحب أضيف ، من المستحسن أن تــُخبر مكتب حجز الطيران إنك عريس ورايح شهر عسل
بعض الخطوط تعمل لك خدمه إضافيه مجاناً على ذوقهم هم قد تكون كيكه ترحيبيه أو هديه تذكار أنت وحظك
أذكر إحدى عضوات المنتدى كان حجزهم على ما أظن على خطوط الإمارات وكان معها طفله وأول ما دخلوا الطياره تقول فاجئتنا المضيفه بهديه عباره عن شنطه عليها شعار الخطوط وفيها أوراق رسم وتلاوين ودبدوب وبعض الأشياء كهديه للطفله وكانت مفاجئه مفرحه بالنسبة لهم
فندق أكماني خيار جيد وأزيد عليه أنه قريب من منطقة سارينا يعني تقدر تدقها تمشيه كعابي أنت والمدام تروحون لمنطقة سارينا اللي فيها السينما ومطاعم شيليز وبرجر كينج وستار بكس وبعض المطاعم الأخرى وهذي المنطقه العمل فيها على مدار اليوم والليله 24ساعه
إذا المدام بتحمل شنطه خلها تنتبه لها زين ولا تشيلون كاش واجد مع إن الدار أمان إلا أن الحرص واجب ، قرأت مره أنه أحد الشباب مر بجنبه صاحب دباب مسرع وخطف الشنطه وهرب ولكن للأمانه المنطقه اللي كان ماشي فيها هذا الشاب من المناطق المشبوهة ولكن كما قلت لك الحرص واجب والدار أمان
نصيحه أخرى إذا بتروحون للجبل خذ معك من السعوديه بخاخ اسمه (ARS) تحصله في بنده بعشره ريال يكفيكم السفره كلها تبخون منه على المناطق المكشوفه من الجسم وأنسى موضوع الناموس أو الباعوظ وترى ريحته زينه يعني ما كنك حاط شي ومع إني ما عندي مشكله مع الباعوظ في الجبل ، شكله يعرفني بس انت عريس ويمكن تدلع عليك العروس
في الجبل بتحصل محلات على جوانب الطريق يصلحون ذره مشوي وبعضهم عندهم بطاطس عسليه يسمونها ( أوبي ) يسوونها مشوي أو مسلوق هذي الشغلتين لا تنسى تذوقها وانت تتفرج على مناظر الجبل طبعاً البطاطس هذي فقط في إندونيسيا ما عمري شفت زيها في أي بلد في العالم بس يرحم والديك إذا عجبتك تدعيلي
في الجبل وفي اندونيسيا عموماً لا تأكل من الباعه المتجولين أو من المطاعم التي لا يعرفها الناس إلا إذا لك تجربه سابقه
آخر شي لا تنسى المظله، الدنيا أمطار
وشهر عسل موفق ورحله سعيده
المفضلات