الموضوع: توزيع الايام استفسارات والحجز من اجودا

السلام عليكم ومساء/صباح الخيرات
الحمدلله بفضل الله تم الحجز على 12 اغسطس حتى 28 يعني تقريبا 15 ليلة
واتمنى منكم الفائدة من أجل توزيع الايام بشكل مناسب لي وللعائلتين 8 اشخاص وبيبي الله يحفظهم جميعا
أنا وزعت توزيع مبدئي
الوصول يوم 13 ظهرا جاكرتا الاتجاه من جاكرتا للجبل مباشرة وهذا في حال حجز الفيلا مسبقا
13- 17 - الجبل 5 ايام
17- 21 باندونق 4-5 ايام
العودة للجبل يومين
يوم باقور
26+27 جاكرتا
يوم 28 المغادرة بإذن الله


تعمدت بالخطة وضع الجبل مباشرة بعد الوصول لأن ما اريد يضيع علي الوقت ووصولي تقريبا يوم الاربعاء فهل يصادف إجازة او زحام.. أعرف ممكن بدري لكن لأن حجزت تقريبا الفنادق بباندوق وجاكرتا واريد بعد ذلك اخذ ارائكم بها
وسؤالي عن اجودا عندما اتيت للحجز وطلب بطاقة الائتمان تبين لي أنه يخصم مبلغ وإن الالغاء مجانا لكن يأخذ المبلغ مباشرة من البطاقة وفي حال الالغاء فالترة المسموحة يرجع المبلغ خلال اسبوعين وسمعت في حالة الالغاء ياخذ نسبة او مبلغ بمقدار.. فهل هذا صحيح ؟
* هل يوجد مدن بين المدن المذكورة تستحق الزيارة ويمكن زيارتها سأرجع لجدول المصباح وبعض الاعضاء جزاهم الله كل خير على مايبذلونه من جهد لخدمة إخوانهم
*هل 4 أيام تكفى باندونق
هل يوجد فلل خاصة في باندونق -باقور مثل الجبل ولا ؟
*السائق ياجماعة الخير قررت احجز سيارتين انوفا من اجل الارتياح وكذلك اخذ الراحه بالتنقل فالافضل الانوفا ولا اخذ سيارة كبيرة 12 راكب...
واسعارها بشهر اغسطس كم يوصل حدها
* هل ممكن الاستغناء عن السائق بجاكرتا ولا الافضل بقائه معي حتى المغادرة
* كم ممكن تكلفني الرحلة إجمالا يعني ميزانية 15وتزيد قليلا هل تكفي معيشة تنقل سكن بدون التذاكر
هذي طبعا حسب خطة وضعتها ..
وإذا ممكن ماهي الاشياء الضروريه اللي تلزم الدفع مثل الفيزا و...؟! لعمل حسابه وضبط الميزانية
والتذاكر بشكل مجمل للحدائق والمنتزهات
شاكر لكم ومقدر وقتكم لاهنتم جميعا
والشكر مقدم لكل من شارك بموضوعي السابق ومن افادني ومن سيفيدني بإذن الله ويدلو بدلوه وربي يشرح صدره وييسر امره

مواضيع عشوائيه ممكن تكون تعجبك اخترناها لك:

• إستفسار عن السفر ﻷندونيسيا في شهر واحد ميلادي
• استفسار عن
• اسفسار بخصوص فندق بولمان
• بسافر الى اندونيسيا انا مع ابوي بليز جاوبوا اسألتي
• الحجز عن طريق النت؟؟؟؟؟
• خبراء بالي
• ياليت تساعدوني في اسعار التذاكر في اندونيسيا
• تخطيط متكامل لزيارة بالي وبنشاك
• مساعدة من الخبراء وجزاكم الله خير
• استفسار بخصوص السكن في بونتشاك وبالي
• ابي جدول تكفونن الفزعه ي عيال
• الإخوة الخبراء الفضلاء أرجوا توجيهي بماترونه مناسب ولكم حبي وتقديري
• استفسارات بسيطه
• استفسار عن شقق جاكرتا وبونشاك
• لايفوتكم ترى فيه توزيع هدايا
• استفسارات متعدده الكايــد
• استفساراتي ابوفصولي
• محتاج النصيحه لأول رحلة الى اندونيسيا
• السلام عليكم تم حجز الرحله ۔ ولله الحمد ۔
• ابي جدول للرحله

أعطيك رأيي ولك القرار ،،
فكرة الذهاب للجبل مباشرة جيدة خاصة وصولك يوم الأربعاء ويكون عندك وقت للبحث عن فيلا رغم التعب ومواصلة المشوار ولكن إذا بالكم طويل توكل على الله ،،
فكرة العودة للجبل من باندونق ما ادري ما عجبتني ولو تطول بباندونق افضل للعائلة من بوقور وممكن تزور بوقور من الجبل وتخصص لها يوم كامل والمهم تبتعد عن السبت والأحد ،،
موقع بوكنق اسهل وغالبا ما يخصم والأسعار واحدة ولا غيرك السعر في البداية لانه في الخطوة اللي بعدها يضيف الضرائب عكس بوكنق يعطيك السعر شامل الضريبة والسعر واحد في كل المواقع تقريبا ومن تجارب ،،
الميزانية حسب السكن وهل تقصد ان المبلغ لكل عائلة ولا العائلتين !! إذا العائلة الواحدة يكفي إن شاء الله بخيارات اقتصادية وممكن تختار فنادق نظيفة واقتصادية وتختار غرفتين لكل عائلة مثل في باندونق عندك فندق هاريس باندونق او ايبيز باندونق فنادق حلوة ونظيفة واقتصادية وموقعها بجوار مولات وتجد تقرير عن فندق ايبيز باندونق في تقريري مع العائلة ،،
ممكن جاكرتا تختار فندق هاريس كلابا قادنق او استون بلويت وتجد تقارير لها ومناسبة للعوائل ،،
أنا افضل الفنادق على الشقق وهذا رأيي فقط وغيري يخالفني في ذلك والعائلة اختلفنا في هذه النقطة ولكن حسب المزاج ،،
لا داعي لزيارة مناطق اخرى وتكفيكم هذه المناطق الثلاثة وممكن تختار في جاكرتا زيارة جزيرة من شاطىء انشول وتحجز لها من المكاتب هناك وتجربة جميلة ،،
أحجز سيارتين والجميع يأخذ راحته افضل من سيارة بهذا العدد إذا كان لكل عائلة محرم ،،
ممكن تستغني عن السائق بجاكرتا وتستخدم التكاسي بالعداد خاصة عدد العائلة قليل ويكفي 4 أفراد ،،
ما ادري باقي شيء ما شفته والله الأيباد يطلع العين ،، من الموبايل

الله يعطيك العافية اخوي المصباح فعلا بوكنق يعرض بالضرائب وانا باجودا لقيت عرض افضل من بوكنق وكمان بعد الخطوة الثانية حتى الدفع ومع الضرائب ولو كان في زيادة بسيطة بس تستحق..لأختلاف عدد الاشخاص المسموح بالغرفلكن عندما وصلت لتاكيد الحجز شفة الشرط انه يخصم المبلغ وفي حال كنسلته قبل 10 ايام من الوصول يرجع كامل المبلغ..


وحلو بإذن الله نكمل على الجبل وكلنا محرم واحد يعني التخطيط بالفنادق تكون شقة 3 غرف وكذلك بالجبل فيلا ب 3 غرف كاقل تقدير والميزانية لنا كلنا وهذا بعد ما شفت الفنادق وعملت حجز لبعضها بس بقي السكن بالجبل وقد تزيد الميزانية
وبإذن الله بعطيك اسماء الفنادق للنصح بها من عدمه اللي بباندونق وكذلك جاكرتا
فكرة حلوة زيارة جزيرة وكاني سمعت عنها لكن ما بحثت ..المكاتب فين احصلها ؟ وكم التكلفة ل 5 بالغين و3 اطفال
وانا بيني وبينك يعني احاول الميزانية ماتكون مكلفة مره لكن ماتمنعني ايضا من الاستمتاع لان عندنا ميزانية للتسوق اخرى
باقي تكلفة التذاكر والاشياء التي تلزم الدفع عند الوصول .
وتسلم ماقصرت وسلامة عينك

الله يعافيك ويحفظك ،،
موقع اجودا خيار جيد ويعطي حسب تجربتي السابقة له نقاط عبارة عن دولارات ولكن بوكنق مميز من ناحية عدم الخصم على طول وهذا يعطي مساحة للتغيير بدل الانتظار حتى يعود المبلغ ويساوي لخبطة في الميزانية ،، هذه الفكرة فقط
احيانا موقع الفندق يعطيك سعر اقل وصارت معي في بعض الفنادق ولا أنسى فندق الخيال بادما في باندونق ،،
بالنسبة للميزانية من رأيي تزودوها شوي يعني 20000 للاحتياط غير موضوع التسوق وهناك تتحكم بالصرف ،،
ممكن ارشح لك شقق استون فراغا بباندونق وتعتبر جيدة وخيار اقتصادي وتوجد فيلا في منطقة داقو تعتبر راقية ونظيفة وإذا تذكرت اسمها أعطيك عنوانها وهي موجودة بموقع بوكنق ،،
السائق اعتقد تكفيك سيارة واحدة حسب تجربتي السابقة كنا 5 بالغين وطفلين والسيارة تكفي ولكن المشكلة الوحيدة الشنط اثناء التنقل من مدينة لمدينة تسبب زحمة وضيق للعائلة ،،
جزيرة انير تحجز لها من مكاتب في انشول قبلها بيوم والطريقة سهلة والسواق يسهل عليك وممكن من خلال زيارتكم لانشول تحجزون لليوم التالي وانا افضل تجعل 3 ايام لجاكرتا في الأخير اذا ودكم زيارة الجزيرة ،،
يوجد رقم سواق بباندونق في تقريري ممتاز ومناسب للعائلة وباله طويل ودليل سياحي ممتاز ولكن لغته انجليزية ومتمكن وممكن تحسن لغتك معه كما حدث معي ،، أنصحك به وسيارته جديدة ونظيفة او اي سائق اخر وأفضل من نفس باندونق
حاول تقسم المبلغ على الأيام وتأخذ معك مبلغ اليوم فقط لان فلوسهم تغري بالصرف وتحوس ميزانيتك ،،
ضع خياراتك بالنسبة للسكن ونعطيك رأينا والأعضاء ما يقصروا ،، الله يسلمك من الموبايل

هذه مجموعة فلل في باندونق ومنطقتها باردة وهادئة ،،
http://www.holidayvilladago.com/ar/about-us/ من الموبايل

تسلم اخي المصباح وإذا عند الانكيش إن شاءالله مقدور عليه وبسيطهوالسيارة بيني وبينك ودي وحده لكن لأجل الراحه بالتنقل والجلسة المريحة قررت سيارتين ..ولا افكر بالسوزوكي المتشرة عنده وتكفي ممكن 8 ركاب لكن مشكلة العفش بالتنقلات وش حلها يعني من مدينة لمدينة !
لأن عارف انت فكرت فيها وايجار سيارتين ممكن توصل من 4500 -5000 !! وراحت ربع او ثلث الميزانية !!
فاتمنى اعرف منك او من الاخوان السوزوكي المعروفة ودائم نشوفها بالتقارير تكفي 8 اشخاص يعني 3 اطفال معنا و5 كبار


ارسلتلك على الخاص اخوي ولاهنت إذا دخلت شوفها ورد علي على الخاص بخصوص الفنادق لأنه يهمني ...
طبيعة ومناظر باندونق كيف أيهما احلى هي ولا الجبل ..والعائلية أكثر ...
يعني نبغى مناظر خلابة وجميلة وشلالات وكمان راحه ..بعيد عن كثرة الشباب
ولك جزيل الشكر والعرفان ..
وبقية الاعضاء لاتبخلو برأيكم

الله يسلمك وتم الرد ،،
بالنسبة للسيارة انت حرب هناك وشوف الوضع وقلل من العفش بقدر المستطاع ،،
الشباب في الجبل بكثرة وهذا شيء طبيعي والجبل يعتبر قرية والشوارع ضيقة يعني هو طريق واحد رايح جاي وتجد زحمة وباندونق مدينة والشباب قليل فيها وحتى العوائل والفرق ان الطبيعة والأجواء في الجبل وهذه ميزة الجبل رغم سلبياته يبقى رمز للطبيعة ومن يعشقها ولا مقارنة في ذلك ولكن كما قلت لك هناك سلبيات مقابلها وانت تشوف بنفسك وتجرب ولا تلتزم بمكان اذا ما عجبك والمكان الذي تجد راحتك فيها تجلس وتطول فيه وقد تلغي باندونق وتجلس بالجبل وممكن العكس ،،
البلد حلوة بكل سلبياتها وإيجابياتها وتوكل على الله ،، من الموبايل

تسلم اخوي المصباح واستفسار لاهنت ولا يهون بقيت الاعضاءعشان اعمل حسابي مضبوط سعر الصرف للريال مقابل الروبية كم بالعادة وكم ممكن يكون باغسطس؟ ومن فين أفضل صرف
والتعامل هناك الافضل بالدولار ولا الريال ..انا مريت على مواضيع واستفيدت انه بالريال افضل اصرف خاصة مقبلين على موسم الحج وممكن يكون حلو الصرف
وهل ترشح اخذ فيزا معي ولا ماحتاج علما بكل سفراتي اعتمادي على النقدي وهذا اللي اشوفه افضل واريح لي
وجزيرة انشول هل هي بنفس جاكرتا يمكن الذهاب لها بالسيارة ولا منفصلة عنها
وكم سعر دخول الفرد للمدينة وكذلك للألعاب سواء الصغير اوالكبير لأن سمعت لدخول المدينة تذكرة وللألعاب تذكرة اخرى
وهل نفس السائق الخاص تبعي يكون معي ولا لازم من نفس المدينة ؟
اعذرني ثقلت بالاسئلة بس لأعمل حسابي واستفيد ولأجل إذا سائق من نفس المدينة يصير اكنسل السائق تبعنا بدل مانصرف هدر كذا
واذا في رابط عن انشول شامل اطرحه لي لا هنت ويبارك لك ربي ويحفظك لاهلك وعيالك

نسيت رابط الجداول ،،
http://www.arabtravelersforum.com/travel823853 من الموبايل

ماقصرت اخوي المصباح تسلم كفيت ووفيت ..انا اللي حسيت اني تورطت قاعد اعمل حساباتي على صرف الريال =3300 !! بتحويل العملات هههه واحس فالموضوع إنا فاستغرب على حسبتي 15 يلا16 ..واشوف الناس اكثر ..ويم قلتلي 20 احتياطا قلت طيب
بعدين جلست احسبها واطقطق براسي والله طلعت حسبه على سعر الصرف إن كان 1=3000 .. لكن إن شاءالله اصرف ويكون الصرف ب3100 واكثر
وسعر سيارة انوفا ممكن كم يكون بالروبية او بالريال ..علما بأني رايح بنص شوال يعني بعدها الناس بتكون بعودة إن شاءالله ويخف البلد شوي رغم متوقع حيكون زحام بس ربي ييسر ويبارك بالوقت والرحله

اخي المصباح لا هنت ولا هان بقية الاعضاء ومن لديه خبرة ونصيحة لحجز المقعد بالطائرة ممكن مو تلك الاهمية لكن احب استفيد وكذلك اتمتع اكثرالافضل الجلوس بالطائرة جهة اليمين او اليسرى اثناء رحلة الذهاب وكذلك العودة ايهما افضل ..انا مريت على مواضيع وانه البعض بجهة معينة يستطيع التمكن من رؤية عدة جزر..
بالعودة حجزت باليمين والذهاب اليسرى ...


وكان لي عدة اختيارات للمقاعد لكن لم اجدها متوفرة وبحكم إنه معي اطفال ابحث عن مقاعد تناسبهم ولرغبتي اخترت المقاعد اللي بجانب الزجاج..نوع الطائرة بوينج 777/300
لكن المقاعد رقم 43 a ثلاث مقاعد... اللي خلفها دورات مياه الظاهر الله يكرمكم هل هي مناسبة ام حتكون مزعجة وفيها ريحه من أجل ان اغيرها إن كان كذا
ويوجد حسب موقع الخطوط مقعدين رقم 44 L بس ماني متاكد مقعدين ولا 3 ...وشو خلفها لأن ركبت الطائرة قبل كم يوم لكن ما تاكدت


انا كان بودي من 48 وتحت لأن حتى المنظر يطلع واضح وبعيد عن الجناح


وكيف مقعد 56 L لأن حجزت العودة عليه..يمين الطائرة ..
ويوجد امكانية بالمقاعد الخلفية من 62 - 70 بعضها متوفر بالجهتين ..هل هي مناسبة
النزول بدري من الطائرة مايهمني قد ما يهمني اني اكون مرتاح بالجلوس ومايكون حولي إزعاج


اعرف الموضوع مو مستاهل ...ولا يهمني لكن ممكن كرغبه وحب معرفه والحصول على الافضل

موضوع المقاعد مهم للعائلة ولو تستطيع حجز المقاعد الأمامية افضل وحاول تحجز المقاعد الأربعة اللي بالمنتصف والثلاث اللي بجوارها يمين او يسار ما يهم وانت تحجز مقعد في الطرف من الثلاث الاخرى يعني على صف واحد ،، المشكلة احيانا تجد بعض الشباب وكلمة شباب كبيرة عليهم شوي ويسببوا ازعاج وهذه من عيوب اندونيسيا ورحلاتها ،، لا تستعجل بالخروج واستغرب من البعض وكأنهم في سباق للحصول على الفيزا ،، ضع ببالك الزحمة لاحق عليها وخاصة الجبل ولكن اخف شوي من ايام شوال الاولى ،، السيارة في حدود 500-600 الف روبية وأشوف السوزوكي أوسع حسب تجربتي .. من الموبايل

صدقت اخوي لكن الاشكالية الاغلب منا يبغى بالطرف جوار الشباك لأجل كذا فقلت احجز كذا واخليها بخلف بعض...لكن المقعد اللي اخترته تشوفه مناسب ولا .. ونسأل الله ما يكون في ازعاج وتتيسر الامور..والله يوفقك اخوي ..
الايام رجعت وزعتها
5 الجبل
3باندونق
4 الجبل
3 جاكرتا
شو رأيك ولمبانق كيف جواها؟ يعني هل فالجبل او باندونق منطقة باردة .. وممكن باحد ايام الجبل الذهاب لباقور والعودة بنفس اليوم وإذترشح أي مدينة ثانية قريبة بالامكان زيارتها حلو
جاكرتا زدتها يوم قلت لأنشول يوم ويومين تقضية بين الاسواق والاماكن السياحية ..لأن تعرف معنا حريم ويبغو اسواق ولسه لي فرة على مواضيعك ومواضيع الاعضاء اللي تخص مثل هالشئ والاستفادة منها
وتسلم اخوي على الرد وجزيت خيرا

كلامك صحيح وانا جربت في الذهاب حجز المقاعد الثلاثة وراء بعضها وفي العودة اخترت الأربعة في الوسط وبجوارها اثنين وهي اللي ارتاح الجميع معها ،، ما هي مشكلة طالما بجوار بعض والمهم تطول بالك مع الأطفال الله يحفظهم شوي متعبين وإذا معك رضيع خذ مياه صحية صغيرة ولا تعتمد على المضيفات !! وبعض الأطعمة الخفيفة وجاكيت تحتاجه في الجبل بالليل والطائرة تكون باردة ..
توزيعك طيب ولكن العودة للجبل من باندونق تجعلها حسب راحتك في باندونق يعني لا تحجز سكن في الجبل فمن الممكن تعجبك باندونق وتزود الأيام فيها وبالنسبة لمنطقة لمبانق هي ضاحية في باندونق وفيها البركان وكامبونق جاجا ولا تفوت زيارته فهو ممتع للأطفال وقبل اي شيء تركب الباص وتأخذ جولة وفيها ألعاب مائية جميلة ما شفناها الا في الأخير وهذه غلطة مني !! وعندك كامبونق داون تتعشى فيه وجلسة لا تفوت ،،
بالنسبة للأسواق عندك أسواق جيدة ومشهورة في باندونق وهي الاوت لك وهذا موضوع عنها :
http://www.arabtravelersforum.com/travel354183
وتجد تجربة شخصية لأحدها في تقريري العائلي الأخير ..
جاكرتا اهم الاسواق الشعبية والرخيصة منقا دوا وشمباكا ماس والاتريوم حلو وبضاعته جيدة وهذا موضوع يفيدك :
http://www.arabtravelersforum.com/travel272322 من الموبايل